Þekkingin fær meira pláss
Áratuga reynsla og þekking býr innan Rekstrarvara og nú ætlum við að gefa meira af henni pláss á RV.is. Nýr frétta- og fróðleikshluti sameinar fræðslu, reynslu, nýjungar og fréttir úr ólíkum áttum starfseminnar.
RV.is hefur tekið miklum breytingum að undanförnu. Nýr vefur fór í loftið fyrr á árinu og þótt margt hafi breyst síðan þá er þróun hans hvergi nærri lokið. Við höldum áfram að byggja ofan á grunninn, bæta upplýsingum við og finna betri leiðir til að koma þekkingu, úrvali og þjónustu RV til skila á vefnum.
Vefverslunin er auðvitað stór hluti af RV.is, en fólk kemur ekki alltaf til okkar vitandi nákvæmlega hvaða vöru það vantar.
Hvaða lausn hentar okkar vinnustað? Hvaða vél ræður við þetta rými? Hvernig getum við minnkað notkun og sóun? Hvað þýðir þessi umhverfisvottun? Og hvaða kaffilausn hentar okkur?
Þetta eru spurningar sem fólkið okkar fær á hverjum degi. Svörin byggja á reynslu og þekkingu sem hefur safnast upp hjá RV í áratugi - og nú fær hún meira pláss á vefnum.
Þekking, úrval og þjónusta
Þekking, úrval og þjónusta hafa lengi verið leiðarljós Rekstrarvara og sömu áherslur hafa fylgt okkur í vinnunni við nýjan RV.is.
Úrvalið er augljósasti hlutinn. Þar eru vörurnar okkar. En samhliða vefversluninni höfum við verið að byggja upp síður og fræðslu sem hjálpa fólki að átta sig á hvað hentar þeirra rekstri.
Undir Þinn rekstur er hægt að nálgast úrval og lausnir út frá ólíkum vinnustöðum og starfsemi. Undir Lausnir má kafa dýpra í allt frá kaffilausnum og gólfþvottavélum til handþvottar, mottulausna og umhverfisvottana. Heilbrigðissviðið sameinar svo sérhæft úrval og fræðslu fyrir heilbrigðis- og umönnunargeirann.
Þjónustan er ekki síður stór hluti af því sem við gerum. Viðskiptavinir okkar fá sinn tengilið hjá RV sem þekkir reksturinn og heldur utan um viðskiptasambandið, með aðgang að sérfræðingum okkar þegar þörf er á. Á vefnum viljum við styðja við þá þjónustu með upplýsingum og úrræðum sem eru aðgengileg þegar á þarf að halda.
Svo eru hlutir sem eiga einfaldlega að vera einfaldir. Komdu í viðskipti á til dæmis að gera nákvæmlega það sem nafnið segir - auðvelda fyrirtækjum að hefja viðskipti við okkur.
Nú bætist frétta- og fróðleikshlutinn við.
Frá fólkinu okkar
Hvernig velur þú rétt efni fyrir atvinnuuppþvottavélina? Hvenær borgar sig að skoða ræstiþjarka? Hvað getur rétt skömmtun sparað? Og hvað þarf að hafa í huga þegar hreinlætislausnir eru valdar fyrir leikskóla?
Þetta eru spurningar sem fólkið okkar svarar reglulega. Nú ætlum við að færa meira af þeirri þekkingu yfir á RV.is og fá fleiri sérfræðinga innan RV með okkur.
Hér mun birtast fræðsla um hreinlæti, heilbrigðisvörur, vélar, kaffi, stóreldhús og ýmislegt annað sem kemur við sögu í daglegum rekstri. Inn á milli koma vörukynningar, nýjungar, viðburðir og fréttir frá RV.
Það er af nógu að taka.
Ný hugmynd? Ekki alveg.
Við vinnuna við vefinn hef ég líka verið að gramsa í gömlum Rekstrarvörulistum, RV-fréttablöðum og öðru efni úr safninu. Eftir því sem ég skoða meira af því verður skýrara að þessi hugsun er alls ekki ný.
Gömlu listarnir voru miklu meira en vörur og verð. Þar má finna leiðbeiningar um ræstingar og vinnuaðferðir, umfjöllun um val og notkun efna og búnaðar, hagkvæmni, umhverfismál og ýmislegt fleira.
Á einum stað er talað um „lifandi ráðgjöf“. Annars staðar er RV lýst sem „þekkingarfyrirtæki í stöðugri þróun“ og áhersla lögð á að ráðgjöf og leiðbeiningar séu samofnar þjónustunni.
Við erum sem sagt ekkert sérstaklega að finna upp hjólið.
Sami kjarni, nýjar leiðir
Það er eitt af því sem mér finnst skemmtilegast við þessa vinnu: að sitja með um 40 ára gamlan Rekstrarvörulista við hliðina á nýjum RV.is og sjá sömu áherslur birtast þar aftur og aftur.
Þekking. Úrval. Þjónusta.
Rekstrarvörur hafa verið fjölskyldufyrirtæki frá upphafi og sama fjölskyldan hefur staðið að fyrirtækinu í meira en fjóra áratugi. Frá árinu 1982 hefur starfsemin vaxið og þróast, úrvalið breikkað og ný svið bæst við – en sagan sýnir líka vel hvað hefur haldist.
Í gömlu efninu birtist aftur og aftur áhersla á vöruþekkingu, ráðgjöf og að skilja þarfir viðskiptavinarins. Í grunninn er það sami kjarni og við vinnum eftir í dag.
Leiðirnar eru einfaldlega fleiri. Á RV.is getum við tengt fræðslu við vörurnar, safnað saman upplýsingum um ólíkar lausnir og gefið reynslu og sérþekkingu fólksins okkar meira pláss.
Nýi frétta- og fróðleikshlutinn fær að byggjast upp með vefnum - og sagan fær líka að fylgja með. Eftir meira en 40 ár hefur safnast upp ansi mikið af myndum, sögum og efni úr starfseminni. Eitthvað af því á eflaust eftir að rata hingað inn.
