Faglegar lausnir kynntar á NORNA 2025

Mölnlycke, einn af leiðandi framleiðendum heilbrigðisvara á heimsvísu, var meðal aðalstyrktaraðila NORNA – Nordic Operating Room Nurses Congress sem fram fór í Hörpu dagana 11.–12. september. Rekstrarvörur tóku þátt í ráðstefnunni ásamt Mölnlycke og kynntu lausnir sem styðja við öryggi, gæði og sjálfbærni á skurðstofum.

NORNA er alþjóðleg ráðstefna skurðhjúkrunarfræðinga á Norðurlöndum og mikilvægur vettvangur fyrir miðlun þekkingar, nýjustu rannsókna og lausna sem stuðla að öruggari og skilvirkari heilbrigðisþjónustu.

Á bás Mölnlycke tók heilbrigðisteymi Rekstrarvara á móti gestum ásamt sérfræðingum framleiðandans. Þar gafst þátttakendum kostur á að kynna sér fjölbreyttar lausnir fyrir skurðstofur og aðra klíníska starfsemi, með sérstaka áherslu á sýkingavarnir, sárameðferð og vörur sem styðja við öryggi sjúklinga og heilbrigðisstarfsfólks.

Mölnlycke hefur um áratugaskeið verið leiðandi á sviði heilbrigðislausna og þróar vörur sem eru notaðar á sjúkrahúsum og heilbrigðisstofnunum um allan heim. Fyrirtækið leggur ríka áherslu á nýsköpun, klínískar rannsóknir og sjálfbærni við þróun lausna sinna.

Sem samstarfsaðili Mölnlycke á Íslandi leggja Rekstrarvörur áherslu á að veita heilbrigðisstarfsfólki aðgang að vönduðum vörum, faglegri ráðgjöf og sérfræðiþekkingu sem styður við örugga og árangursríka umönnun.

Ásdís Ósk Heimisdóttir, sviðsstjóri heilbrigðissviðs Rekstrarvara og hjúkrunarfræðingur, var á staðnum ásamt teymi Mölnlycke og átti fjölmörg góð samtöl við ráðstefnugesti um nýjungar og þróun innan skurðhjúkrunar.

Við þökkum öllum sem komu við á básnum fyrir áhugaverð samtöl og hlökkum til áframhaldandi samstarfs við heilbrigðisstarfsfólk um allt land.