Rekstrarvörur

TENA - leiðandi vörumerki í þvaglekavörum

TENA býður upp á fjölbreytta línu sem veitir öryggi, þægindi og sjálfstraust allan daginn. Vörurnar eru hannaðar til að veita hámarks rakadrægni, frábæra öndun og draga úr lykt. TENA leggur áherslu á húðvæna hönnun, mjúkt efni og áreiðanlega vörn – þannig geta notendur lifað sínu daglega lífi af öryggi og reisn.

Þú getur fengið persónulega leiðsögn um þvaglekalausnir RV í rólegu og þæginlegu viðtalsherbergi. Heilbrigðismenntað starfsfólk okkar tekur vel á móti þér og veitir faglega ráðgjöf.

Hægt er að bóka viðtalstíma á netfanginu hjukrun@rv.is og í síma 520-6666.

Skoða allar þvaglekavörur

Þvagleki

Fólk á öllum aldri getur upplifað þvagleka. Læknisfræðilega er þvagleki skilgreindur sem minnkandi geta til að halda þvagi. Ástandið getur verið tímabundið og tengst t.d. þvagfærasýkingu, hægðatregðu, blöðruhálskirtli, ákveðnum sjúkdómum eða lyfjanotkun. Í mörgum tilvikum er hægt að bregðast við með tiltölulega einföldum meðferðum. Mikilvægt er að hunsa ekki einkenni heldur leita til læknis ef þvagleki gerir vart við sig.

Þvagleki er algengur um allan heim og má ætla að um 50 þúsund íslendingar búi við slíkt ástand í dag. Tíðni þvagleka er þrisvar sinnum hærri hjá konum en körlum og eykst eftir því sem fólk eldist. Margir eiga erfitt með að ræða þvagleka opinskátt sem getur leitt til félagslegrar einangrunar eða þess að fólk forðist að vera meðal annarra.

Í mörgum tilfellum geta grindarbotnsæfingar og blöðruþjálfun borið mikinn árangur og bætt stjórn á þvaglátum. Að lokinni greiningu getur læknir einnig lagt til önnur úrræði sem henta hverjum og einum.

Samningur SÍ við Rekstrarvörur

Sjúkratryggingar Íslands eru með samning við Rekstrarvörur þar sem skírteinishafar geta snúið sér beint til Rekstrarvara til þess að fá afgreiddar þvaglekavörur sem eru niðurgreiddar af SÍ. Greiðsluþátttaka SÍ er 100% og sækir heilbrigðisstarfsmaður um heimild fyrir þig eða skjólstæðing þinn. Rekstrarvörur sjá svo um að koma vörunum heim til notanda, hvert á land sem er, þeim að kostnaðarlausu.

Einungis þær vörur sem merktar eru með SÍ krossinum í vefverslun eru niðurgreiddar af SÍ. Niðurgreiddar vörur afhendast í heilum kössum, en margar vörurnar fást einnig í minni pakkningum í verslun RV og í flestum apótekum. Einnig er í boði að fá afhentar prufur af vörunum áður en pantaður er heill kassi. Allar SÍ niðurgreiddar vörur sem geta nýst skírteinishafa fyrir sína persónulegu notkun falla undir niðurgreiðsluna.

Hvaða vöru á ég að velja?

Hver einstaklingur er sérstakur og að ýmsu þarf að hyggja, svo sem hvers eðlis þvaglekinn er, líkamsbyggingu, hreyfigetu og aðstæðum viðkomandi. Til þess að hver og einn fái fullnægjandi úrlausn, bjóðum við hjá Rekstrarvörum mikið úrval af viðurkenndum og þæginlegum vörum frá TENA og Libero.

TENA er leiðandi á heimsvísu í framleiðslu hjálpargagna fyrir þvagleka og stöðugt eru þróaðar nýjar vörur. Því getur verið yfirþyrmandi að skoða vöruúrvalið frá TENA og reyna að meta hvaða vörutegund, stærð og rakadrægni hentar þér eða skjólstæðing þínum.

Fylgdu þessum þremur skrefum til að þrengja listann og sjá hvaða vörur gætu hentað þér áður en þú pantar vöruprufur.

Skref 1: Velja vörutegund

Vörutegund er hægt að ákvarða út frá líkamlegu ástandi notandans hvort, eða hversu mikinn stuðning hann þarf frá umönnunaraðila.

Ákveðnar vörur henta best þeim sem hafa getu til að skipta sjálfir um vöruna, en aðrar eru hugsaðar til að auðvelda skipti með aðstoð umönnunaraðila. Einnig getur lauslegt mat á magni þvagleka verið hjálplegt til að meta þá vörutegund sem kemur til með að henta notandanum sem best.

Nánari upplýsingar um vörutegundir

Skref 2: Ákvarða rakadrægni

Hvort sem þú eða skjólstæðingur þinn upplifir smávægilegan leka eða mikla þvag- eða hægðalosun er mikilvægt að velja vöru sem hentar þörfum notandans. Dropafjöldi er ákvarðaður eftir því hversu mikill leki á sér stað yfir daginn. Þetta getur breyst eftir drykkjuvenjum og því hversu oft viðkomandi skiptir um vöru og fer á salernið. Þvaglekavörur ættu ekki að koma í stað salernisferða, svo notandinn ætti einnig að fara á salernið ef að möguleiki er á því.

Ekki nota vöru sem er rakadrægari en þörf er á, þar sem það eykur kostnað og sóun að óþörfu. TENA notar dropakvarða til að sýna hversu mikla rakadrægni varan hefur. Libero bleyjur fara hinsvegar eftir þyngd í kílógrömmum en ekki eftir rakadrægni né mittis- eða mjaðmamáli.

Skref 3: Mæla líkama og ákveða stærð

Athugið að ekki þarf að mæla líkama fyrir lekabindin, einungis lekastykki eða netabuxur sem sitja utan um mjaðmir og/eða kvið. Ekki þarf að mæla líkama fyrir Libero bleyjur, þar er farið eftir þyngd í kílógrömmum.

Margir halda að stærri stærðir hafi meiri rakadrægni. Því velur fólk oft stærri stærð í stað þess að velja meiri rakadrægni. En rakadrægnin eykst ekki bara vegna þess að varan er stærri. Einnig getur of stór vara aukið líkur á leka þar sem hún situr ekki þétt á líkamanum. Því er mikilvægt að velja vöru sem passar notandanum vel og situr örugglega.

Vefðu málbandinu þétt utan um líkamann og skrifaðu niður málið í sentimetrum.

Opna TENA stærðartöflu